توحيد مقامات

الجميل في أي مقياس تغير محترم، أنه يعطيك قياس كمي لشيء ممكن قياسه بالنسبة لشيء آخر يمكن للجميع أن يعتمده كمرجع، يعني 100 غم أكثر من 0، كيلو إلا 250 غم، 15 دقيقة متأخر، ضايل نص ساعة، أو حتى 12 رختر ويعطيك العافية وما في حتى سطر جديد.

المشكلة قد تكون في قياس شيء كمي ولكنه يعتمد على وجهة نظرك "النوعية"! يعني 60 سنة ... إشي كمي ... 60 سنة من التهجير ... مش إشي كمي ... لأنو هالستين سنة، شو قيمتهم النوعية، ومن أي وجهة نظر. تخيل إنو عم بيحكوا إللي ورا الجدار إنو هدول 60 سنة من البناء! ومن ناحية تانية، في جماعة عم بيقولوا برضوا بمقياس كمي ... ستين سنة ... وبمقياس نوعي ... ستين سنة من النكبة !

أي لأ يا حبيبي ...

هدول ما بتصير تقيسهم هيك، أو بتحدد حالك منيح وبتثبت المتغيرات وبتحكي 60 سنة على خروج فلان الفلاني وحرمه المصون من داره من البلد الفلانية وعدم عودته هو شخصيا أو نسله. وعدا ذلك ... بيكون مقياسك غلط كميا ونوعيا ...

يعني تخيل إنو عندك واحد صارلوا 10 سنين عم بيبني بها الدار ... ممكن إنك تحكي إنو هالزلمة مسكين صارلوا 10 سنين عم بيبني بهالدار وما خلص! بس إذا كان إبن العرص صاروا 10 سنين عم بيبني بهالدار وبنفس الوقت شامطلوا 12 عمارة ... أي لأ مش صارلوا 10 سنين بيبني بهالدار. يا بتقول بنالوا 12 عمارة كل وحدة بست شقق ، ودار بعشر سنين يا بتقول صارلوا عشر سنين بيبني ب 12 عمارة ودار ... بس ما بتقول صارلوا 10 سنين عم بيبني بهالدار ... المسكين ... إلا إذا عشان الحسد ... الله يكفينا شرو... أو إذا بدك تقارنوا بجارو اللي صارلوا سنتين بيبني والبيت على وشك إنو يتشطب (وينزل عن شارع المقاولات) هداك صارلوا 10X12X6 + 1X10 سنة عم بيبني بالدار ... 730 سنة من البناء ... أو بتقول ... بنى الدار الواحدة ب 10/71 سنة ... 0.71 سنة ...

فا بالتالي ... إعملك جدول زغير ... حط فيو مقياسك الكمي بالسنين ... وحوّل مقياسك النوعي لإشي كمي من وحدة معينة، ويا سيدي إعملها إعتباطيا ...

60×1
41×1
.
.
.
15×3
2×8
_____ +

وإجمع ... هادا وضعك بالسالب ... وإذا عدوك بدو يفرح بإنجازاتو ... وبإنجازاتك لإلو ... بيطلعوا يحتفل بالرقم اللي إنتا فيو ... بالسالب ... مشكلتك مش بس 60 سنة من النكبة ... مشكلتك "أعمق" من هيك ...